[English] [Chokwe] [Portuguese]

Sango Lipema

Mu I Timoteo Kp 2 v 5 tunatange ngwetu `mumu kwali Zambi umuwika, ni chitakanyishi umuwika hakachi ka Zambi ni atu, iye mwe mutu Kristu Yesu'.

Kachi mutu manyingika uwape wa Zambi chamutamba kutayiza ngwenyi `kwali Zambi umuwika'. Iye Zambi ya mwono, kakuhanjika, kakwivwa kulemba cha ana jenyi ni kakumona mwono wo. Izaia 38 v 5 `Yehova kanambe, mwe Zambi ya kalamba ke Ndawichi ngwenyi, Hinevwa kulemba che, hinamona masoji je'. `Yehova wahanjikile ni Mose meso ni meso ngwe mutu mahanjika ni kasendo kenyi'. Kutuhuka kp 33 v 11. Haliapwila, talenu kuli tuzambi twenu! `Makanwa ali no alioze keshi kuhanjika. Meso ali no alioze keshi kumona. Matwi ali no alioze keshi kwivwa!' Masamu 115 v 5-7. Kulipwila chinene! Kashika, chuma chitangu chakutamba kulinga, hichika tuzambi twe ni fuliela ngwe `kwali Zambi umuwika!'

Mba chakutamba nawa kufuliela ngwo kwali `chitakanyishi umuwika'. Chitakanyishi chapwa ngwe chau. Twakufupa chau hanga atukwase kuzauka lwiji nyi. Kuchi te tunafupa umwe chitakanyishi? Mumu ha shili. Ewa, shili jetu. `Uhenge wenu hiwahandununa hakachi ka yenu ni Zambi, milonga yenu hiyanufukila meso jenyi kanupanjikile.' Izaia kp 59 v 2. Mumu ha shili yetu kutwahashile kuheta kuli Zambi. Umwe chatamba kulinga sambukila hakachi ka Zambi ni atu. Tunanyingika jina lia chitakanyishi. Iye Yesu Kristu. Mutuhasa kuzauka kuli Zambi mumu ha milimo yenyi ha kulusu a kavwale. Milimo yenyi yika? `waliechele ndando ya ukuule hali eswe'. Ha kulusu Kristu hanevu lamba linene mumu ha uhenge wetu. Hanatambula mu mujimba wenyi fweto ya shili jetu. Kashika chakutamba kutayiza ngwe yena mukwa shili.

Chuma chimwe chipema kunyingika ngwe kutwahashile kuzauka kuli Zambi shina ni Kristu. Iye mwene wambile ngwenyi `ye jila yami, ni we umwenemwene, ni we mwono. Nuimwe meza kuli Tata shina ni yami'. Yoano kp 14 v6. Maria hi chitakanyishi ko, umwe kalayi hi chitakanyishi ko, niumwe shina Mwene Yesu Kristu. Chakutamba kunyingika nawa, chipwe yitanga yipema ye kuyahashile kulinga milimo ya chau. `mumu ku vumbi hanaulilamwina, ha kufuliela. Chino hi cha kuli yenwene ko, alioze chawana cha Zambi. Hi cha ku yitanga ko, kuchina umwe meseka kulisamba'. A-Efwesu kp 2 v8-9.

Kashika, hanga atambule uwape :
wa ukonekeno wa shili.
Kunyingika sambukila ni Zambi Musandu
Kupwa ni mwono wa mutolo,

ni chakutamba...

  1. Kufuliela Mwene Yesu Kristu ni kumutayiza ngwe Chitakanyishi. Yilinga kp 16 v 31.
  2. Kulikonyeka ku shili je. Yilinga kp 20 v 21.
  3. Kuhichika shili ni milonga yeswe ni Kulihandununa ku yipi yeswe. Yilinga kp 26 v 20.

Waze eswe mamufuliela kechi katoka nilimwe tangwa. Atu eswe mamona kwalumuka chinene mu kwenda chenyi tangwa ha tangwa. Mapwa ni usona wunji kunyingika upale wa Zambi. Mapwa ni usona kutanga liji lia Zambi. Mapwa usona wunji kukunguluka hamwe ni ana a Zambi ni kwononoka shimbi jenyi.

Mba muze Kristu meza, mukwa kristu eswe maaya kwilu hamwe nenyi ni kutwama ku zuwo lia Zambi ha miaka yeswe. Kachi iye mafwa shimbu kanda Kristu meza, mujimba wenyi mapwa mu fuka alioze spiritu ni alma jenyi matwama kwilu hamwe ni Mwene! Chocho tunambe ngwetu lie Sango Lipema! Ufamane Zambi!

Brian Howden